Анчелоти: Загубивме тројца клучни играчи, но имаме подобар тим од лани!

Карло Анчелоти со максимален ангажман влегува во секој фудбалски предизвик кој го има пред себе, па сега си постави високи цели и за првата сезона со нов формат во Лигата на шампионите.

Реал Мадрид како актуелен шампион ќе ја брани титулата во Европа, но за да стигне до највисокото скалило, овојпат патот ќе биде уште подолг и потежок.

Новиот формат во најелитното натпреварување носи дополнителни натпревари за сите екипи, меѓутоа Карло верува дека сите многу брзо ќе се аклиматизираат на новите услови, а воедно и ќе ги прифатат.

Ширината на составот дефинитивно ќе игра многу важна улога оваа сезона, а Анчелоти на пресот пред мечот со Штутгарт беше запрашан дали неговиот тим е подобар од лани.

– Видовте што се случи ова лето. Си заминаа Начо и Крос, двајца играчи кои беа клучни за тимот. Си замина и Хоселу кој исто така беше важен, но за возврат го добивме еден од најдобрите играчи во светот. Јас мислам дека имаме подобар тим од минатата сезона, – изјави Анчелоти.