Анчелоти за родителскиот гест кон изненадувањето во стартната постава: Заслужува да игра многу повеќе (Фото)

Карло Анчелоти мораше да прави промена во последен момент во стартната постава, од едноставна причина што Кепа Аризабалага се повредил на загревањето и почувстувал болка со која му го отстапи местото на Лунин.

Украинскиот голман брзо беше тестиран и успеа да му одбрани пенал на Џало во 6-та минута, а тоа беше одлична вест за него, но и за соиграчите кои во продолжение постигнаа три гола.

Анчелоти принудно му даде шанса на Лунин и доби одличен одговор од Украинецот, но денеска имаше и едно изненадување во почетните 11, а тоа беше Брахим Дијаз.

Поранешниот играч на Милан сериозно западна во втор план кај Карло и одигра само 19 минути на последните седум меча, но вечерва беше стартер и маестрално одговори на довербата која му беше укажана.

Брахим го постигна голот за 1:0 и му беше поништен уште еден, но поради залагањето и играта во дефанзива, доби и прегратка од Карло кога беше повлечен од игра.

– Прегратката со Брахим? Морав да го пречекам како татко своето дете. Постигна гол, еден му беше поништен и неговата работа во дефанзива беше извонредна. Што да кажам повеќе, заслужи да игра многу повеќе од тоа што го доби досега од мене. Ова е знак дека сите во тимот се подготвени за игра, сите сакаат да учествуваат на теренот. Сите се сериозни и многу професионални и најчесто заслужуваат да играат многу повеќе од тоа што го добиваат, – изјави Карло.

Carlo Ancelotti y Brahim 😍🤍 pic.twitter.com/kbq7r0w92N

— REAL MADRID ♥️ (@AdriRM33) November 8, 2023