Анчелоти за ризичната тактика на Флик: Тоа може да биде клучен фактор во финалето

Високо поставената одбрана на Ханси Флик донесе голем ризик за Барселона на последното „Ел Класико“, но на крајот се покажа како извонредна тактика поради фактот што тимот победи 0:4, а неговите дефанзивци во безброј наврати ги „уловија“ ѕвездите на Реал Мадрид во офсајд ситуации.

Споменатата стратегија на германскиот стручњак се покажа како добитна комбинација на „Сантијаго Бернабеу“, па Карло Анчелоти е свесен дека неговиот тим ќе мора да бара решенија за нешто слично и утревечер во Џеда.

Суперкуп финалето во Саудиска Арабија носи нова „Ел Класико“ пресметка, а Карло Анчелоти се надева дека исходот ќе биде ист како минатата година.

– Зборувавме за нивната високо поставена одбрана и за офсајд ситуациите од првото „Ел Класико“. Ќе мора да пронајдеме противодговор на некој свој начин. Свесен сум дека тоа може да биде клучен фактор на натпреварот.

– Ова е финале и станува уште поспецијално бидејќи играме против Барселона. Влегуваме во мечот со голема страст и мотив, играњето со Барселона носи дополнителен притисок. Ќе биде тешко и за нив и за нас, но верувам дека ќе играме многу добро и дека ќе победиме. Оваа титула има вредност за нас, кога пред една година го освоивме Суперкупот, на крајот завршивме и со трофеите во Ла Лига и Лигата на шампиони. Ова е трофеј кој може да ни донесе позитивна динамика до крајот на сезоната, – порачува Анчелоти.