Анчелоти за откровението кое најмногу изненади на последните четири меча: Ќе ми биде тешко да го оставам на клупа

Тешките повреди кои го погодија Реал Мадрид го натераа Карло Анчелоти да направи провотимец од Раул Асенсио, а по своите четири извонредни настапи како стопер на „кралскиот клуб“, младиот стопер се избори за место во составот на италијанскиот стручњак.

Враќањето на Орелијан Чуамени значи дека Анчелоти повторно ќе го има Французинот како опција за стопер, но во пресрет на дербито со Атлетик Билбао, Карло призна дека сега ќе му биде тешко да го извади Асенсио и да го префрли на клупа.

– Чуамени се опорави добро од повредата и сега е подготвен за игра. Ни стои на располагање и утре ќе одлучам како ќе го искористам.

– Асенсио ни покажа дека е стопер на кој може да се потпреме. Играше со огромна самодоверба, покажа дека не му недостасува знаење за позицијата на која игра.

– Сигурен е, не му недостасува мотивација и придонесе многу за тимот на последните неколку натпревари. Ќе мора добро да размислам дали да го оставам на клупа. Позитивно ме изненади, особено со зрелоста и со спокојството со кое игра. Го положи „пеколното крштевање“, сега е првотимец на Реал Мадрид и ќе ми биде тешко да го оставам на клупа, – изјави Анчелоти пред дербито.