Анчелоти со интересен предлог: Потребно е ново правило за доброто на фудбалот

Реал Мадрид се спаси од сензационален пораз од Елче и успеа да се врати и да израмни на 2:2 во судиското надополнување, бод кој изгледа навистина добро ако се земе во предвид дека „кралевите“ губеа со 0:2 до 82-та минута.

Погодоците на Модриќ и Милитао му обезбедија бод на Карло Анчелоти во натпреварот кој можеше да има и поинаков тек, бидејќи Карим Бензема не реализираше пенал при резултат 0:0, а потоа се повреди и ги загрижи фановите на Реал.

Добра вест е што ќе следи пауза во наредните две седмици, па медицинските лица на Реал Мадрид ќе имаа повеќе време да ја санираат повредата и да го подготват Французинот за дуелите со ПСЖ во Лигата на шампионите.

– Ќе мора да се направат тестови и да се утврди за што точно се работи. Не е истото од Сан Себастијан и мечот со Реал Сосиедад. Се надевам дека ќе ни се врати брзо, – изјави Анчелоти, кој одново не беше задоволен од судиското продолжение кое го одреди главниот арбитар.

– Судиското продолжение е лично убедување на секој арбитар, а тоа во случајот го одредува четвртиот судија. Тој ја одредува ефективната игра и не можам многу да додадам. Сметам дека треба да се воведе правило за точно сметање на ефективната игра и така да се одредува продолжението. Верувам дека тоа би било добро за фудбалот, сите сакаме да гледаме повеќе фудбал, а помалку прекини, – заврши Анчелоти.