Анчелоти: Реал Мадрид победува поради Флорентино!

Карло Анчелоти во својата богата тренерска кариера имаше можност да соработува во неколку големи клубови во Европа, но кога е во прашање Реал Мадрид, Италијанецот тврди дека „кралскиот клуб“ е неколку скалила над другите.

Дон Карло беше тренер на великани како Јувентус, Милан, Челси, Баерн и ПСЖ, но според него, ниту еден не може да му се доближи на Реал кога е во прашање аурата која ја има во целиот клуб.

– Работев во многу клубови од највисок размер, но Реал Мадрид е убедливо најголем во светот и во историјата. Тоа го велам поради организацијата, поради барањата кои ги има клубот поради историјата и традицијата. Тоа го сфаќате дури откако ќе пристигнете тука, величината уште повеќе доаѓа до израз.

– Резултатите не доаѓаат сами по себе, Реал Мадрид победува и ден денеска поради извонредната работа на претседателот Флорентино Перез. Работата која ја заврши изминатите години е неверојатна и сите во клубот сме свесни за тоа.

– Реал Мадрид е едно големо семејство, минуваме многу време во клубот и атмосферата прави да го вадите најдоброто од себе. Секој ден кога доаѓаме во клубот, се чувствуваме како да сме дома. Кога доаѓате со страст на едно работно место, тогаш тоа јас не го сметам за работа. Ние правиме нешто во кое уживаме, а такви услови ни овозможуваат сите во клубот. Јас не работам, јас уживам во Реал, – потенцира Анчелоти.