Анчелоти: Овојпат не се налутив, но не можам да разберам една работа

Реал Мадрид покажа две лица во дерби пресметката со Атлетико, но одново успеа навреме да реагира и да направи пресврт со кој се пласираше во полуфиналето на Копа дел Реј.

Атлетико беше подобар тим во првото полувреме и поведе со голот на Мората, но откако не искористи свои шанси за втор гол, следеше казна на спротивната страна која започна со мајсторијата на Родриго, а која беше комплетирана со голови на Бензема и Винисиус во дополнителните 30 минути.

Карло Анчелоти изгледаше многу мирно дури и во ситуација кога Реал губеше до 79-та минута, па поради тоа беше запрашан како успеал така добро да ја избалансира лутината по лошото прво полувреме.

– Што им кажав на полувреме? Овојпат не се налутив, едноставно беше. Ритамот кој го наметнавме беше бавен и лош, а во второто полувреме беше комплетен контраст. Публиката не притисна и ни даде крилја и на крајот успеавме да израмниме, а потоа и да победиме.

– Овојпат не бев лут, многу бев лут на мечот со Вилјареал. Јас секогаш верувам во овој тим, верувам дека имаме ресурси да се вратиме и да излеземе подобри на теренот. Во вториот дел не ја променивме стратегијата, го променивме менталниот склоп, имавме повеќе енергија во секој дуел. Понекогаш и мене ми е тешко да сфатам една работа. Тешко е да се сфати како еден тим може да игра толку лошо прво полувреме, а толку добро второ полувреме. Замените не направија подобри и многу сум задоволен на крајот, – изјави Анчелоти.