Анчелоти откри во кој момент ќе размислува за фудбалска пензија: Не постои живот без стрес

Карло Анчелоти пред две вечери беше гостин на специјална фудбалска конференција во Мексико и неговото долго обраќање беше пренесено во неколку дела, бидејќи италијанскиот стручњак говореше за својата методологија и начинот на кој ги менаџира големите ѕвезди, но и за планот кој го имаа во оваа подоцнежна фаза од кариерата.

Целта на Дон Карло е да остане уште некое време во Реал Мадрид и да се пензионира во најдобриот клуб во светот, но сепак не исклучува сценарио да остане и малку подолго од предвиденото, бидејќи во себе се уште чувствува оган кој го тера да оди напред и да бара нови предизвици.

Анчелоти освои се што може да се освои во тренерската кариера на клупски план, па Мексиканците го прашаа од каде црпи инспирација да остане се уште активен на 65-годишна возраст.

– Не постои живот без притисок и без малку стрес. Не е добро да имате премногу стрес, но малку стрес доаѓа како гориво. Денот кога нема да имам „оган“ во себе и возбуда пред еден натпревар, тогаш ќе знам дека е време да прекинам.

– Пред натпреварите се уште имам големи грижи, имам негативни чувства дека нешто нема да оди како што треба, дека противникот ќе постигне гол. Кога ќе почне мечот, сето тоа сопира и мора да останете мирен за да се справите добро со случувањата на теренот. Мислам дека доста добро ми оди, – вели Анчелоти.