Анчелоти: Немавме доволно време, но мотивирани сме да го освоиме првиот трофеј

Реал Мадрид има можност победнички да ја отвори новата сезона и тоа со трофеј во Супер Купот на УЕФА каде за ривал ја има италијанска Аталанта.

Таа средба е закажана за вечерва од 21 часот во Варшава, а тренерот на „кралевите“ Карло Анчелоти се надева дека ќе се прикажат во најдобро светло иако екипата немаше соодветни подготовки, поточно поради различни причини не можеше да го има на располагање целиот тим во овој почетен дел од кампањата.

-Едвај чекаме да започне натпреварот со Аталанта. Играме за првиот трофеј сезонава, тежок меч. Сакаме силно да ја започнеме сезоната, свесни сме за предизвиците. Тимот изгледа добро иако немавме многу тренинзи, но мотивирани сме за натпреварот.

-Аталанта заслужува да биде тука, бидејќи ја освои ЛЕ. Гасперини има големо искуство, тој е мој пријател. Работевме заедно во Јувентус, имам фантастичен однос со него. Ќе биде тежок меч, -рече Карло кој говореше и за Килијан Мбапе.

-Мбапе е во добра форма, како и сите момци. Немавме многу време да тренираме, но изгледаме добро. Килијан добро се снајде. Сите имаат шанса да играат. Мбапе добро се адаптираше, фокусиран е на тренинзите, мотивиран и работи напорно. Тој постојано го покажува својот неверојатен квалитет, -подвлече Италијанецот.