Анчелоти: Не е до Винисиус и Мбапе, проблемот е на друго место!

Реал Мадрид имаше неколку разочарувачки изданија од стартот на сезоната, па иако тоа успеваше да го компензира со тешко извојувани победи, последните два меча сепак јасно ставија до знаење дека проблемите за кои зборува Карло Анчелоти се уште не се решени.

По тешкиот пораз од Барселона на „Ел Класико“ и примените четири гола, Реал вчера прими три на домашен терен од Милан, па по поразот од 1:3, Анчелоти повторно алармираше за неизбалансираноста во играта на неговиот тим, како и за лошата дефанзивна структура која недостасува во овој момент.

– Мора да бидеме загрижени, ако продолжиме вака, ќе биде тешко да останеме во игра за најважните трофеи во април и мај. Не сме способни да го прикажеме најдоброто од себе и мора да работиме на решавање на проблемите. Ако не ја вратиме солидноста која не красеше со години, ноќите во Европа ќе станат многу долги за нас.

– Главниот проблем е во дефанзивната структура, примаме премногу голови за тим кој ја градеше својата игра врз база на избалансирана игра и континуитет.

– Не е проблемот кај Винисиус и Мбапе, главен проблем е играта во дефанзива, проблем е леснотијата со која ривалите пристигнуваат и ни создаваат многу шанси. Точно е дека сме неефикасни и во нападот, но главниот проблем е во дефанзивната структура. Мора да се вратиме на основите на фудбалската игра, мора да го промениме пристапот за да се браниме подобро како тим. Мора да најдеме решение, но тоа не значи дека сега ќе менувам се за да дојдеме до тоа, – изјави Анчелоти.