Анчелоти направи две несекојдневни измени против Рајо: Немам проблеми да бранам резултат

Карло Анчелоти успеа да заштеди дел од своите ѕвезди за големото дерби со Атлетико Мадрид во Лигата на шампиони, па во последните 15-тина минути го извади и Килијан Мбапе во ситуација кога тимот водеше со 2:1.

Реал Мадрид не искористи неколку добри шанси да има помирна завршница со Рајо Валјекано, па Дон Карло се одлучи за подефанзивен пристап и бранење на водството во финишот, а доказ за тоа се измените кои ги изврши.

Анчелоти на местото на Родриго и Мбапе ги стави Феде Валверде и Камавинга, а во анализата која ја направи за остварената победа, најави дека нема проблем да ги вади напаѓачите и на нивно место да става играчи за врска.

– Мбапе постигна гол и беше важен играч на денешниот натпревар. Тој и Винисиус беа добри до 70-та минута, а потоа мислев дека треба да го зацврстиме средниот ред.

– Кога сакам да одбранам нешто, немам проблем да ги извадам напаѓачите, немам проблем да го направам тоа. Претходно го извадив и Родриго, мислам дека ќе му дојде добро малку одмор пред натпреварот кој следи во среда во Лигата на шампиони, – изјави Анчелоти.