Анчелоти: Ми велат дека сум „стара школа“, но еве ме тука и по 30 години

Карло Анчелоти е послободен во периодот кога најголем дел фудбалери на Реал Мадрид имаат обврски кон своите репрезентации, па затоа и прифатил гостување на Универзитет во Мадрид.

Италијанскиот стручњак зборувал за својата кариера и промените во фудбалот, потенцирајќи го фактот дека играта е многу променета во однос на фудбалот од пред три децении.

– Фудбалот е променет, се менува и ќе се менува. Тоа го подразбира интензитетот на играта, но и правилата, како и тренингот и методолијата за подготовка. Сега зборувам за поразличен спорт во однос на 90-те години.

– Јас сум тука и по 30 години, што значи дека сум се адаптирал добро. Технологијата ги промени нашите животи, моите соработници од стручниот штаб ми велат дека сум „стара школа“, но јас ја сакам технологијата и ја користам нејзината помош во работата.

– Во однос на формулата за успех на еден тренер, потребни му се интелигентни фудбалери и клуб кој ќе му изразува максимална поддршка, – рекол Анчелоти.