Анчелоти лут на своите фудбалери, го воочи главниот проблем по киксот со Мајорка

Реал Мадрид киксираше на стартот на новата натпреварувачка сезона, резултат кој никој не го очекуваше со оглед на формата, но и тимот кој го одбра Карло Анчелоти.

Италијанецот им се довери на истите 11 играчи кои го освоија европскиот Суперкуп пред неколку дена, па иако Реал добро почна и поведе против Мајорка, на крајот освои само бод, а можеше да претрпи и пораз.

„Кралевите“ изгледаа доста летаргично во одбрана и му допуштија доста противнапади на домашниот тим, кој по голот на Муричи за 1:1, имаше уште две контри од кои можеше да профитира.

Карло Анчелоти по мечот не беше задоволен од изданието на својот тим, а самиот посочи дека главен проблем била организацијата и лошата игра во одбрана како тим.

– Добро го стартувавме мечот, тргнавме офанзивно и постигнавме гол. Можевме да дадеме и втор, но потоа во вториот дел ни недостасуваше рамнотежа. Ова беше натпревар кој можевме и да го загубиме бидејќи немавме баланс. Ова не беше добар меч за нас. Ние сме многу офанзивен тим, но дефанзивната рамнотежна е клучна за победи.

– Не сум среќен, не сме задоволни од освоениот бод. Можеше многу подобро, но нема да бараме изговори. Од овој меч може да научиме многу, бидејќи беше јасно каде беше нашиот проблем. Не бевме добри во дефанзива, немавме баланс како тим во дефанзивен поглед.  Не вршевме пресинг кога ја губевме топката и не работевме како колектив да ја вратиме назад. Не станува за еден, двајца или тројца играчи, сите потфрливме како тим во дефанзивен поглед. Мајорка беше многу подобро организирана во дефанзива и ремито е коректен резултат, – изјави Анчелоти.