Анчелоти има проблем со недисциплина: Мора да ги почитуваме новите правила

Карло Анчелоти не можеше да биде задоволен од падот во концентрацијата која ја доживеа неговиот тим во финишот од мечот со Алавес, но покрај тоа што зборуваше за двата примени гола, Италијанецот на пресот најави и дека ќе поработи на дисциплината во неговиот тим.

Играчите на Реал Мадрид имаат проблем да се навикнат на новото фудбалско правило за протестирање, па поради тоа, до оваа фаза на сезоната веќе собраа девет жолти картони поради непотребни испади.

Од оваа сезона, само капитените на тимовите имаат право да разговараат за судиите, а арбитрите немаат никаква доза на толеранција со останатите играчи кои доаѓаат до нив да приговараат.

Вчера жолти картони против Алавес поради протести добија Винисиус, Валверде и Модриќ, со што се стигна до бројката од девет опомени поради оваа причина од стартот на сезоната.

– Јасно е дека имаме проблем со недисциплина. Треба да се навикнеме и да го прифатиме новото правило. Има само едно решение. Треба да престанеме да протестираме и точка! Без разлика дали е праведно или не, мора да се навикнеме на новото правило и да избегнеме вакви работи, – изјави Анчелоти.