Анчелоти ги подбра своите стартери: Понекогаш треба да преземат одговорност и да подигнат рака

Реал Мадрид одигра две различни полувремиња и се прикажа во две светла пред домашните навивачи на „Сантијаго Бернабеу“, но најважно е што успешно го положи првиот испит на домашен терен.

„Кралевите“ го победија Валјадолид со 3:0 благодарение на доброто издание на измените кои ги направи Карло Анчелоти, по што Италијанецот почувствува потреба да ги подбере своите стартери кои не изгледаа баш свежо во еден дел од мечот.

Топлото време во Шпанија и големата влажност прават условите за игра да бидат пеколни, а Анчелоти од своите ѕвезди побара да покажат доблест и да не форсираат во ситуацијата кога има посвежи играчи на клупата како што беа денеска Брахим Дијаз и Ендрик.

– Кога победуваме, мора да бидеме задоволни, а денеска особено треба да биде така после потешкотиите во првиот дел.

– Разговарав со играчите и побарав една работа од нив. Нормално е побрзо да се заморуваат во вакви временски услови, но исто така треба да бидат одговорни и да подигнат рака кога веќе не можат. Треба да побараат измена и да им дадат простор на соиграчите. Имаме огромен квалитет на клупата, тоа се покажа и денес, – изјави Анчелоти.