Анчелоти: Еден тим изгледа перфектно во Европа, но клучните натпревари се играат во март и април

Карло Анчелоти се врати во родната Италија за време на празниците и направи предновогодишно интервју со „Раи Радио 1“, разговор при кој опфати доста актуелни теми, вклучувајќи ги и настапите на најсилните тимови во Европа со новиот формат во Лигата на шампиони.

За разлика од обично, апсолутните фаворити сега не се истакнуваат така доминантно како во претходната групна фаза која беше актуелна со децении, но Карло е убеден дека Реал Мадрид полека го фаќа потребниот залет, по што ќе биде во најдобра форма за клучниот дел од сезоната.

Италијанецот отсекогаш велел дека формата треба да се темпира за месец март и април, па истото размислување го има и сега во ситуација кога Реал ја брани титулата во Лигата на шампиони.

До овој момент, Ливерпул изгледа како тим кој делува безгрешно на теренот во Премиер лигата и Лигата на шампиони, но Анчелоти смета дека поважно за неговиот тим е да биде подобар од нив во финишот од сезоната, а не на почетокот како што беше случај на „Енфилд Роуд“.

– Финалето во Лигата на шампиони секогаш е цел за Реал Мадрид. Нашиот пат оваа сезона е потежок од обично, но ни преостануваат уште два натпревари од воведната фаза и најважно е да се пласираме понатаму.

– Има еден тим кој изгледа перфектно до овој момент и јасно е дека тоа е Ливерпул. Ќе видиме дали тоа ќе остана така и понатаму, најважно е да се биде најдобар на клучните натпревари во месец март и април, – потенцира Анчелоти.