Аморим предупреди пет играчи на Јунајтед во своето прво интервју: Една работа е најважна за мене!

Рубен Аморим го одработи првото интервју како менаџер на Манчестер Јунајтед во разговор за клупската телевизија, точно пет дена од неговото прво работно попладне како предводник на големиот англиски великан.

Португалецот од стартот на неделата се запознава со новата средина и со условите кои ги нуди Јунајтед како клуб за своите играчи, па во ситуација кога Аморим пристигнува со огромен мотив и глад за докажување, реши да испрати јасна порака до младите играчи за кои Ерик Тен Хаг бараше време поради нивната возраст.

Англиската јавност е навикната да не бара преголема одговорност од млади играчи како Маино, Гарначо, Диало, Хојлунд и Јоро, но Аморим предупредува дека тоа правило не важи кај него.

– Не сакам да се вели дека ни е потребно време бидејќи сме млад тим. Тие петмина се подготвени, мора да бидат подготвени да се носат со одговорноста која ја имаат во Манчестер Јунајтед. Во фудбалот мора да се победува, а само со победи ќе си купиме повеќе време за работа. Мора да стартуваме без страв, без оглед на возраста. Не може да велиме дека не се навикнати да играат добро во континуитет поради возраста.

– Тоа едноставно не ми паѓа на памет, ќе барам од нив од првиот ден да работат на усовршување на мојата идеја. Ако треба да ја опишам мојата филозофија со еден збор, тоа е „тим“. Тимот е најважната работа за мене. Ако работиме како тим, тогаш ќе дојде до израз и индивидуалниот квалитет. Има многу работи кои треба да се поклопат во еден тим. Карактер, борба, начин на игра. Мора да изградиме идентитет како тим, сакам секој наш играч да знае за што игра кога го облекува дресот на Манчестер Јунајтед.

– Има многу работи на кои треба да работиме, на многу ситни детали, но прво и основно ќе се задржам на градење идентитет. Во прв момент, најважна цел за мене ќе биде да изградиме идентитет, – потенцира Аморим.