Аморим пред дуелот со Евертон: Мојс работи подобро од мене

Манчестер Јунајтед се подготвува за гостувањето кај Евертон, екипа која е предводена од поранешниот менаџер на „црвените ѓаволи“, Дејвид Мојс.

Јунајтед победи на само 4 од 14 натпревари по доаѓањето на новиот менаџер Рубен Аморим, додека Евертон сериозно го подигна нивото откако Мојс се врати на „Гудисон Парк“ и го замени Шон Дајч.

Евертон успеа да се најде и пред Јунајтед на табелата во пресрет на ова соочување, а Аморим на едноставен начин го објаснил ваквиот статус на својот тим.

– Очигледно е дека Мојс врши подобра работа од мене.

– Победите и самодовербата се препознатливи, па иако не може да се споредува притисокот во двата клуба, сепак треба да се почитува она што го прави Евертон и неговиот стручен штаб.

– Кога ги гледате нивните натпревари се забележува самодовербата, ова ќе биде тежок натпревар за нас, – рекол Аморим.