Аморим побарал од Јунајтед да му обезбеди двајца играчи на ПСЖ

Манчестер Јунајтед ќе се обиде да го засили тимот уште во јануарскиот преоден рок, но ограничениот буџет не овозможува поамбициозни потфати на новиот менаџер Рубен Аморим.

Сепак, под притисок на новата лоша резултатска серија, Португалецот инсистира на освежувања во тимот, а француските медиуми тврдат дека „црвените ѓаволи“ го контактирале ПСЖ не за едно, туку за две имиња од ростерот на Луис Енрике.

Аморим смета дека во нападот има потреба од играч како Рандал Коло Муани, францускиот репрезентативец за кого е најавено дека нема сериозна иднина во ПСЖ и за кого неговиот актуелен клуб веројатно би се согласил на трансфер за разумна сума.

Французинот посакува да игра во Премиер лигата и Манчестер Јунајтед би бил навистина атрактивна опција, посебно во ситуација кога ќе сака да се докаже во толку квалитетна лига.

Многу потешка мисија за премиерлигашот е Нуно Мендеш, фудбалерот кој е посебно почитуван од Аморим и има само 22 години, но засега и самиот нема донесе одлука за својата иднина. Мендеш има договор со ПСЖ до 2026 година и тоа го прави подостапен за други клубови, но во овој случај и францускиот шампион не сака лесно да се откаже од неговите услуги и ќе се обиде да го убеди да потпише нов договор.