Аморим: Јунајтед е голем клуб, но не и голем тим

Рубен Аморим е свесен за предизвикот кој му го донесе преземањето на менаџерската функција во Манчестер Јунајтед и се обидува трезвено да ги анализира работите среде првата сезона во која ќе седи на клупата на премиерлигашот.

Во пресрет на новите обврски на неговите играчи во домашното првенство, Аморим зборувал отворено со новинарите и во свој стил испорачал неколку пораки, кои секако се најинтересни за големата фан база на клубот.

– Една работа е јасна. Манчестер Јунајтед е голем клуб, но во моментов не и голем тим. Свесни сме за тоа и не е проблем да го кажеме отворено.

– Од друга страна, нашиот клуб е веројатно најголем во историјата на Премиер лигата, па проблем е што не сме на тоа ниво. Мора да се фокусираме на мали детали, со што ќе се подобриме како тим.

– Ако сакаме да ја освоиме титулата во Премиер лигата, мора да трчаме како збеснати кучиња. Дури и најдобрите единаесет на планетава не можат да освојат ништо ако не трчаат многу на теренот, – рекол Аморим.

Јунајтед по поразот од Арсенал ќе се обиде да им се врати на победите на соочувањето со Нотингем Форест, a натпреварот се игра денеска од 18:30 часот.