Аморим и Јунајтед ќе ангажираат поранешен играч на Сити уште во јануари

Рубен Аморим наскоро ќе ја преземе менаџерската функција во Манчестер Јунајтед, а клубот и португалскиот стручњак веќе размислуваат за евентуални засилувања во јануарскиот преоден рок.

„Црвените ѓаволи“ имаат време да ја подобрат својата позиција во продолжение од сезоната, но во ситуација кога повредите повторно имаат влијание и врз формата на екипата, раководството веројатно нема да штеди доколку има солидни опции во зимскиот преоден рок.

„Мирор“ тврди дека Аморим сака да го доведе Данило од Јувентус, односно поранешниот играч на Манчестер Сити, кој би бил засилување за одбраната во вториот дел од сезоната.

Актуелниот капитен на Јувентус го загуби статусот кој го имаше во ерата на Макс Алегри и не е во прв план кај Тиаго Мота, а најавите од Италија се дека „бјанконерите“ не планираат да му понудат продолжување на договорот.

Во јануари, Данило веќе може да почне преговори со други клубови, а во Јунајтед сметаат дека тоа е одлична опција да го доведат за евентуална минимална отштета додека не му истече договорот со италијанскиот клуб.