Аморим го детектираше главниот проблем кај играчите на Јунајтед за време на првиот меч во Премиер лигата

Рубен Аморим немаше деби какво што замислуваше во Премиер лигата, бидејќи Манчестер Јунајтед одигра само 1:1 против еден од најлошите тимови во англиската елита.

Ипсвич го пречека Манчестер Јунајтед како тим кој нема ниту една победа на домашен терен, па иако оваа серија продолжи и против „ѓаволите“, сепак домашниот тим успеа да се израдува на еден бод.

На моменти, Ипсвич изгледаше и како екипа која е поблиску до победа и три бода со оглед на тоа што го тестираше Онана, а сето ова направи дебито на Аморим во Премиер лигата да не биде воопшто блескаво како што се мислеше.

Португалскиот стручњак брзо сфати дека има уште огромна работа пред себе во првиот тим, особено поради фактот што од своите нови играчи бара целосно да го сменат пристапот кој се тренирал со Ерик Тен Хаг.

– Сите играчи се обидуваа да одговорат на моите нови замисли, но на моменти, ги гледав како премногу размислуваат. Едноставно е, за да добиете течна игра, потребно е одредено време. Од тоа што можев да го видам, дел од играчите беа „заглавени“, премногу мислеа на која позиција треба да бидат.

– Тоа беше главниот проблем кај играчите, но само со натпреварите ќе дојдеме до тоа што сакаме. Кога правиме нова структура на целата игра, потребно е да мине време за да дојдете до флуидност и јас го почувствував тоа. За мене важно беше што сите се обидуваа, навистина се обидуваа да го одработат тоа што го побарав. Јас барам играчите да остануваат на своите позиции, дури и во тешки ситуации барам од нив да останат на место.

– Знам дека сето ова звучи фрустрирачки за фановите, но ќе менуваме многу во пристапот на игра и ќе ни требаат натпревари. Следи период во кој ќе страдаме додека да се научиме и ова ќе одземе време. Знаеме дека мора да победуваме, но лесно можевме и да загубиме ако не беше Онана. Мора да се биде реален и да се каже дека играчите добија премногу информации за два заеднички тренинзи, ги менуваме сите ситни детали, па ќе ни треба време за да се разработиме како тим, – изјави Аморим.