Аморим ги загрижи фановите на Јунајтед со најавата за иднината на еден фудбалер

Манчестер Јунајтед пред неколку дена се пофали со продолжувањето на договорот со Амад Диало и тоа е навистина одлична вест за клубот и фановите на премиерлигашот.

Иднината на Диало сега е појасна и тој сигурно ќе биде еден од најважните играчи на „Олд Трафорд“ наредните години, но менаџерот Рубен Аморим не може да гарантира дека истото ќе важи и за Коби Мејну.

Договорот на 19-годишниот англиски фудбалер истекува по две и пол години, а Јунајтед досега имал само неуспешни обиди да гарантира подолго останување на Мејну во клубот.

Агентите на Мејну бараат значително зголемување на платата во новиот договор, нешто што го базираат на актуелниот статус на фудбалерот во екипата, но истовремено му создава проблеми на Јунајтед во однос на бројките поврзани со финансискиот фер плеј. Ваквата ситуација отвора шпекулации за разделба на Мејну со клубот, а посебно заинтересиран за неговиот потпис е Челси.

– Нашата цел секогаш е да ги задржиме најдобрите фудбалери и оние кои се развиваат преку клубот. Но, знаеме во каква ситуација е во клубот и останува да видиме што ќе се случи, – рекол Аморим на прашањето за иднината на Мејну.