Американска легенда го критикувала Меси за неговото однесување по големиот шок во Мајами

Интер Мајами беше елиминиран уште во првата фаза на МЛС плејофот и тоа донесе голем шок и разочарување во редовите на амбициозниот тим предводен од Лионел Меси.

Аргентинецот и неговите соиграчи ќе мора да чекаат до следната година за да направат нешто повеќе во обидот да се обезбеди и првата титула за франшизата, а Меси доби критики за своето однесување од Лендон Донован.

Поранешниот американски репрезентативец смета дека Меси постапил некоректно, откако решил директно да замине во соблекувалната по неочекуваниот пораз од Атланта на домашен терен.

– Не ми се допадна неговото однесување, можеше да се поздрави со противничките играчи. Наместо да им честита или што и да е, тој директно го напушти теренот.

– Можеби го направил тоа во соблекувалната, но тука беа и фановите. Можеше да ги поздрави и да им се заблагодари за поддршката во текот на целата сезона, – рекол Донован.