Амбициозниот Хамес си постави висока цел по враќањето во Шпанија: Сакам да освоиме титула оваа сезона

Хамес Родригез имаше многу примамливи понуди за егзотичен трансфер откако беше избран за најдобар играч на Копа Америка, но искусниот Колумбиец ги стави парите во втор план и реши да се врати во лигата во која имаше извонредни партии.

Родригез направи кам-бек во Ла Лига и направи изненадувачки трансфер во Рајо Валјекано, клуб кој реализираше еден од најдобрите ангажмани по повод 100-годишнината од своето постоење.

Некогашната ѕвезда на Реал Мадрид доби минутажа на последниот меч и дебитираше на „Валјекас“, но како што вели самиот, целите му се многу поголеми од тоа што многумина замислуваат.

– Цел свет знае дека Ла Лига е првенство кое многу ми се допаѓа, а веќе тука ги прикажав своите најдобри изданија. Тоа беше мотив плус да се вратам во Шпанија. Преговорите со Рајо не беа лесни, операцијата беше сложена за клубот, но на крајот се реализираше.

– Рајо има публика која има големи барања, секогаш притиска од трибините и главно оружје ќе биде да играме добро на домашен терен. Мислам дека имаме тим кој може да заврши во топ 6 во Ла Лига, но за Копа дел Реј имам уште поголеми амбиции. Сакам да одиме што е можно подалеку, а зошто да не ја освоиме и титулата? Сакам да освоиме титула во Купот, – изјави Хамес.