Алушовски отпиша двајца играчи за полуфиналето со Загреб: Кантегрел доби предност пред талентираниот Кизиќ

Во својот деветти настап на завршниот турнир во СЕХА лигата, Вардар ќе се обиде да дојде до шеста титула во регионалното натпреварување, мисија која стартува оваа вечер со полуфиналниот дуел со ППД Загреб.

„Плинарите“ се добро познати противници на вардарци и веќе неколку сезони се редовни „пациенти“ на македонската гордост од Скопје, но со оглед на големите промени кои настанаа во тимот, Вардар овојпат не може да се смета за апсолутен фаворит во пресметката.

Тоа го нагласи Тимур Дибиров кој сепак потенцираше дека тимот има за цел повторно да се закити со трофејот во регионалната лига, а во воведот за вечерното полуфинале кое е второ на програмата, сега пристигнаа и официјалните состави кои ги избраа тренерите.

Од повиканите 18 ракометари, тренерот Стевче Алушовски мораше да „прекрати“ две имиња, а на крајот изборот падна на Марко Кизиќ и пивотот Гашовски.

Алушовски на мечот со Загреб нема да може да смета на Стојанче Стоилов кој има коронавирус, па јасно е дека ќе има два пивоти на завршниот турнир во Валчак и Калараш.

Составот на Вардар: Ристовски, Кантегрел, Валчак, Јагуриновски, Димитриоски, Георгиевски, Дисингер, Јотиќ, Калараш, Гаџа, Чупиќ, Талески, Дибиров, Вујин, Векиќ, Мишевски.

Составот на Загреб: Јандриќ, Ашанин, Вистороп, Мраковчиќ, Мандиќ, Божиќ Павлетиќ, Буриќ, Вуглач, Обрадовиќ, Стојниќ, Божовиќ, Матановиќ, Хрстиќ, Млакар, Граховац, Влах.