Алонсо го истрола Хамилтон: Добре дојде во клубот!

Фернандо Алонсо е еден од поранешните светски шампиони во Формула 1 кои настапуваат и во актуелното првенство и немаат доволно брз болид за да се борат за највисок пласман.

Шпанецот кој вози за Алпин е свесен за реалните амбиции кои ги има во францускиот тим, а тоа го искористи и малку да го истрола Луис Хамилтон. Седумкратниот шампион сезонава се мачи со болидот на Мерцедес и е далеку од позицијата на која навикнавме да го гледаме, па со секоја трка се оддалечува од нов трофеј во Ф1.

– Овој спорт е таков. Понекогаш имаш подобар, понекогаш послаб болид, но секогаш мора да се обидуваш да напредуваш.

– Оваа сезона видовме дека во Формула 1, возачот е важен, но не и пресуден. Она што се случува е добар потсетник дека сите тие бројки и рекорди зависат од тоа што го добивате како пакет со болидот.

– Луис вози исто толку добро како и последните години, доминираше во Ф1, соборуваше рекорди на сите страни. А сезонава, ќе извози фантастичен круг и повторно доцни една секунда. Па, Луис, добре дојде во клубот, – му порачал Алонсо на Хамилтон.