Алкарас со фуриозна игра ја мина првата пречка на Индијан Велс

Карлос Алкарас мина како фурија во второто коло на Индијан Велс, Мастерс турнир на кој ја освои титулата во последните две години.

Бранителот на титулата тргна моќно во калифорниската пустина и за 69 минути игра го збриша Кентан Алис, кој денеска можеше да парира само во првиот сет.

Алкарас не остави ништо на случајноста и рано направи брејк кој потоа лесно го одржа за 6:4, додека во вториот сет беше уште подобар и со два брејка си осигура убедливи 6:2.

За нешто повеќе од еден час игра, Алкарас ја оправда фаворитската улога се пласираше во третата рунда на Индијан Велс, каде го чека далеку посериозен предизвик.

Денис Шаповалов е разигран во последно време, па сега ќе го предизвика Карлито кој има намера по вторпат да ја одбрани титулата на својот омилен Мастерс.