Алисон за наследникот кој му го подготвува Ливерпул: Тоа е многу добра идеја

Алисон Бекер е незаменлив на голот на Ливерпул и ќе биде така и во новата натпреварувачка сезона, но можно е да биде така и наредната поради договорот кој го склучија „црвените“ со Валенсија.

Ливерпул се подготвува за животот после бразилскиот голман и реши навреме да си обезбеди достоен наследник, а тоа е Гиорги Мамардашвили кој блескаше на Европското првенство, но и во дресот на Валенсија.

Грузиецот се согласи да се пресели на „Енфилд Роуд“ и трансферот ќе биде официјализиран во наредните два-три дена, но во договорот експресно се вклучи опција за заем, според која Валенсија ќе го задржи Мамардашвили на „Месталја“ една година, а можеби и две.

Тоа ќе зависи од формата на Алисон и одлуките кои ќе ги влече новиот менаџер Арне Слот, но и од плановите на клубот дали Алисон ќе добие нов договор.

– Имам важечки договор со Ливерпул и мојот план е да го одработам истиот. Без разлика на се, сметам дека одлуката да се осигура нов голман е добра идеја на клубот. Знаев за Мамардашвили уште пред да излезе во јавноста и тоа е добра работа за мене. Клубот побара мислење од мене и тоа ме радува. Јас имам уште многу што да понудам на Ливерпул, но добро е клубот да биде подготвен и за иднината, – изјави Алисон.