Алисон распали по новиот формат во пресрет на премиерното коло во ЛШ: Не сме глупави!

Алисон Бекер се соочи со новинарите на пресот кој го одработи Ливерпул во пресрет на дербито со Милан во Лигата на шампиони, но во ситуација кога сите исчекуваат да видат како ќе тече новата сезона во најелитното натпреварување, бразилскиот голман го откри својот искрен став за новиот формат.

Менувањето на целокупниот изглед на групната фаза и распоредот прави да има уште повеќе натпревари во првиот дел од Лигата на шампиони, а според Алисон, фудбалерите полека се претвораат во марионети кои само слушаат и извршуваат заповеди на најважните фудбалски тела во Европа и во светот.

– Новиот формат? За фановите мислам дека ќе биде возбудлив. Уште повеќе натпревари, уште повеќе големи натпревари во групната фаза. И за нас играчите е добро што ќе играме против најдобрите во Европа уште во групата, но треба да се постави прашањето: Дали секогаш мора да се направи тоа со додавање на нови натпревари?

– Календарот и онака беше згуснат, мора да бидам и малку ироничен. Никој не ги прашува играчите што сакаат, се додаваат нови натпревари, а ние сме само марионети. Очигледно нашето мислење не значи ништо, а сите знаат што мислиме. Сите играчи се изморени од ова, не сме глупави и знаеме дека луѓето сакаат уште повеќе натпревари, но треба да се направи план кој ќе биде резонски за сите. Оние што го прават распоредот и новиот формат треба да седнат на маса со играчите пред да носат такви крупни одлуки, – изјави Алисон.