Алиоски: Многу е важно да ја победиме Малта, верувам дека ќе го дадеме најдоброто од себе

Македонската А фудбалска репрезентација е пред нов предизвик, циклус на натпревари за пласман на Европското првенство кое во 2024 година ќе се одигра во Германија.

Првиот натпревар го играме на домашен терен и тоа против селекцијата на Малта, средба на која сме фаворити, но тој статус ќе треба да го потврдиме на теренот на националната арена „Тодор Проески“ во Скопје. Езѓан Алиоски како еден од нашите најдобри и најискусни репрезентативци знае колку е важно да се има позитивен старт, па најавува максимална борба, анажираност за оставрување на посакуваната цел.

-Среќни сме што после неколку месеци повторно се собираме со репрезентацијата на Македонија. Започнуваме нов квалификациски циклус и секако дека посакуваме победа над Малта и старт со три бода. За нас е исклучително важно успешно да ги започнеме квалификациите затоа што потоа ни следуваат многу посериозни натпревари во силната група со Англија, Италија и Украина.

-Посакувам сите да бидеме здрави и комплетни и верувам дека ќе го дадеме најдоброто од себе. Ќе се обидеме да одиграме одлични натпревари за успешни квалификации после историските резултати во последните години, -порача популарниот Џани.

Дуелот со Малта е закажан за 23 март од 20:45 часот, а четири дена подоцна ќе одиграме пријателска со селекцијата на Фарски Острови.