Алегри: Поставивме добра основа да се вратиме на вистинскиот пат

Јувентус го одбрани домашниот терен и славеше над Лацио со 1-0, победа со која обезбеди пласман во полуфиналето на Копа Италија каде ќе ги одмери силите со лутиот ривал Интер.

Погодокот на дефанзивецот Бремер во завршницата на првото полувреме се покажа како доволен за славје на „бјанконерите“ кои во последно време влегоа во една мини криза во која добија и лоша вест, санкција од 15 поени во Серија А.

Овој триумф треба да донесе позитивна енергија, кревање на самодовербата и според тренерот Масимилијано Алегри треба да биде добра основа за подобри резултати.

-Одигравме добро, особено во првото полувреме. Лацио ја имаше топката повеќе во второто полувреме, ама многу малку им дозволивме. Најважен беше ставот кој во немавме во првиот дел во мечот против Монца. Примивме голови кои можевме да ги избегнеме и очигледно научивме лекција.

-Овие се одлични луѓе, одговорни луѓе кои знаат дека духот, ставот е исто толку важен како тактиката и технологијата. Бевме организирани, игравме со трпение и одолеавме на силниот пресинг на Лацио. Секогаш е тешко да се игра против нив, особено се опасни кога брзо ја движат топката. Успеавме да ги забавиме, единствениот силен играч во воздухот им е Милинковиќ-Савиќ кого добро го браневме, -истакна Алегри.