Албанија го зададе првиот удар, но Италија славеше во Дортмунд (ВИДЕО)

Италија со победа над Албанија од 2-1 ја започна одбраната на титулата на Европското првенство што се игра во Германија.

„Аѕурите“ мораа да се потрудат, испотат за да дојдат до посакуваните три бода против аутсајдерот во групата Б во која се уште Шпанија и Хрватска.

Албанците беа тие кои го зададоа првиот удар на „Сигнал Идуна Парк“ и тоа со најбрзиот гол на европските шампионати преку  Бајрами во 23 секунда.

Сепак и покрај овој шок, избраниците на Спалети не ја загубија главата и за кратко време се вратија во игра со комплетен пресврт. Веќе во 16 минута резултатот беше 2-1 за фаворитот, резултат за кој најзаслужен беше двоецот на Интер, Бастони и Барела.

До крајот на првиот дел Италијанеците не искористија уште неколку шанси за да по одморот одново првата шанса ја има актуелниот првак преку Киеза.

Истата не беше искористена и Албанија остана во игра што на крајот можеше да се покажа како џек пот затоа што во 91 минута Манај се најде во идеална прилика, меѓутоа Донарума спречи негова радост.

Во второто коло Италијанците играат со Шпанија, додека четата на Силвињо ќе излезе на мегдан со Хрватска која денеска беше надиграна од „црвената фурија“.