Алба по шокантниот пораз на Интер Мајами: Плејоф форматот на МЛС е несоодветен!

Интер Мајами го заврши настапот во МЛС плејофот по шокантниот пораз на домашен терен од Атланта Јунајтед и резултатот 2:1 во серијата во корист на противникот.

Составот од Флорида освои 34 поени повеќе од Атланта во регуларниот дел од сезоната, но поразот во мајсторката донесе неочекувано рана елиминација за првиот фаворит за титулата.

Жорди Алба како една од ѕвездите на Интер Мајами бил меѓу најгласните во изјавите по мечот и се пожалил на системот на натпреварување кој според него не е коректно поставен.

– Ова беше добра сезона, но секако сакавме да оствариме уште неколку победи. Според мене, овој формат не е фер.

– Знам дека е вака многу години, но ако ме прашате мене, треба да се сретнат шампионите на двете конференции и така да се одлучи шампионот. Сепак, му честитам на противничкиот тим, одиграа одлично против нас, голманот им беше спектакуларен, а и добро ги знаат своите најсилни оружја со кои дојдоа до победата, – изјавил шпанскиот интернационалец.