Ал Итихад подготвен да го собори трансфер рекордот за потписот на Лаутаро

Лаутаро Мартинез и сезонава со своите игри го привлекува вниманието на голем број клубови, вклучувајќи и ги финансиски најдобро поткованите претставници на Саудиска Арабија.

Аргентинецот се уште е во преговори со Интер за новиот договор и фактот што истиот не е потпишан остава можност за дополнителни шпекулации, а европските медиуми пренесоа дека Ал Итихад е клуб кој има сериозен план за Лаутаро.

Актуелниот првак на Саудиска Арабија планира да плати 240 милиони евра за потписот на Мартинез, со што би поставил нов светски трансфер рекорд, а би му создал и големи маки на Интер во однос на одлуката за одбивање или прифаќање на ваква сума.

Наводно, агентите на Аргентинецот веќе ја добиле понудата од азискиот континент и ја разгледуваат, а уште отсега е јасно дека Лаутаро би заработувал многу повеќе од актуелната плата од 6 милиони евра.

Паралелно, Интер кој ги следи и шпекулациите, работи на продолжување на договорот кој истекува во 2026 година, а за двегодишно продолжување е подготвен да му понуди и зголемување на платата на Лаутаро.