Ајакс дефинитивно договори заем на фудбалер на Јувентус

Јувентус неколку недели наназад се обидува да се ослободи од голем број прекубројни фудбалери, а еден од нив во новата сезона ќе го носи дресот на Ајакс.

По долги преговори и многу шпекулации, холандскиот великан конечно постигнал договор со „бјанконерите“ за едногодишен заем на Даниеле Ругани, што значи дека дефанзивецот се сели во Амстердам.

Утре се најавени лекарските прегледи по што Ругани ќе биде претставен во новата средина, а првпат во кариерата ќе има можност да настапува надвор од Италија.

Ругани беше купен од Јувентус во 2013 година, неколку сезони беше позајмуван, а така ќе биде и оваа, при што Ајакс не сакал да се обврзе да го откупи неговиот договор.

Дефанзивецот доаѓа во Ајакс на барање на новиот тренер, сонародникот Франческо Фариоли, кој претходно работеше во Ница и стана прв Италијанец кој ќе го води холандскиот великан.