Агентот на Лаутаро открива: Интер е подготвен за уникатен договор во модерниот фудбал

Лаутаро Мартинез пристигна во Интер од редовите на Расинг за сума од 25 милиони евра во 2018-та година, а пет години подоцна, аргентинскиот напаѓач вреди најмалку три пати повеќе.

Мартинез во меѓувреме прерасна и во капитен на Интер и сите во клубот ги препознаваат неговите вредности на теренот и надвор од него, па затоа во таа насока одат и преговорите меѓу двете страни.

Аргентинецот е под договор со Интер до 2026-та година и двете страни се сложни за продолжување на соработката, а еден од плановите е навистина уникатед и се однесува на тоа Лаутаро да биде редок пример во модерниот фудбал.

Агентот на Мартинез не ја исклучува можноста Лаутаро да остане во Интер цела кариера, нешто што беше специфично за одредени фудбалери во некои навистина поинакви фудбалски времиња.

– Нашиот однос со Интер е изграден од доверба. Мислам дека ќе постигнеме многу добар договор за двете страни. Најважно од се е тоа што менталитетот на двете страни е Лаутаро да остане тука цел живот и сакам да му се заблагодарам на клубот што има такви планови, – вели Алехандро Камано.