Агентот на Бензема со жестока порака: Фудбалот одамна не е приоритет на ФИФА

Карим Бензема играше во одлична форма во текот на целата мината година, а во тој стил продолжи и годинава, предводејќи го Реал Мадрид до посакуваните резултати на повеќе фронтови.

Но, според ФИФА, Французинот не заслужил да се најде во најдобрата постава за 2021 година, нешто што очигледно го налути и неговиот агент, Карим Џазири.

Во најдобрите единаесет се најдоа Левандовски, Меси, Халанд и Роналдо, а немаше место за Салах и Бензема, кои пак ги освоија третото и четвртото место во битката за индивидуалната награда на ФИФА.

– Потегот да не се вклучи Бензема во најдобриот тим за минатата година е непочитување на фудбалот.

– Но, знаеме дека фудбалот не е главната грижа на ФИФА и тоа трае подолго време, – напишал Џазири на Твитер.

Изборот на најдобрата единаесетка го прават професионалните фудбалери од цел свет и за разлика од индивидуалното признание, во него не се вклучени гласови од панел експерти.