Адетокумбо со брутално издание го зграпчи трофејот во НБА Купот (Видео)

Второто издание во историјата на НБА Купот беше приведено до својот крај рано утрово, откако Милвоки и Оклахома ги одмерија силите во големото финале кое се одигра во Лас Вегас и кое заврши со резултат 97:81.

Првите две четвртини донесоа рововска битка на теренот за секоја топка и тимовите често го менуваа водството на семафорот, но Милвоки сериозно истапи на крајот на третата и почетокот на последната четвртина и во тој период го реши победникот.

Серијата на Бакси од 19:5 беше одлучувачка за недостижна предност од 19 поени разлика, па тука стана јасно дека Милвоки е вториот победник во историјата на НБА Купот.

Јанис Адетокумбо беше посебно инспириран и издоминира во финалето со трипл-дабл учинок од 26 поени, 19 скокови и 10 асистенции, издание во кое придодаде и три блокади и две украдени топки.

Огромна поддршка доби од Демијан Лилард кој уфрли 23 поени во финалето, додека по 13 поени запишаа Брук Лопес и Гери Трент Џуниор. Во поразениот тим, Гилџес Александер уфрли 21 поен, а Вилијамс го заврши натпреварот со 18 поени.

Милвоки со оваа победа го презема тронот во НБА Купот, натпреварување кое во премиерното издание лани беше освоено од Лос Анџелес Лејкерс.