„18-та“ доби свој сопственик: Кузмановски официјално промовиран во Битола (Фото)

Како што беше најавено во текот на минатата недела, новата работна седмица почна со специјална промоција во Битола, па така македонскиот првак го официјализираше најголемото засилување за оваа сезона.

Еурофарм Пелистер го искористи лошиот момент на Филип Кузмановски во Вецлар и го убеди да се врати во родната земја, а откако бекот го раскина договорот со бундеслигашот, се врати во матичниот клуб како слободен агент.

Според најавите, Кузмановски денеска беше официјално потврден како нов играч на Еурофарм Пелистер и репрезентативниот бек се очекува многу брзо да прерасне во лидер на тимот, а клубот му го подари и бројот кој го носи во репрезентацијата.

„18-та“ во зелено-бело доби свој сопственик и Кузмановски гордо позираше со новиот дрес, по што за очекување е експресно да дебитира и во Лигата на шампионите.

Кузмановски го гледаше првенствениот меч против Вардар Неготино од трибините, но очекувањата се да биде на теренот против Пик Сегед оваа среда во Битола.